Imbak para sa Oktubre, 2008

Shuttercow #1

Shuttercow is my photoblog. Click on the picture above to see more. Thanks for the visit!

Alam mo ba ang ibig sabihin ng apelyido mo?

Nung isang araw, napakwento ako sa isang kasamahan kong Intsik sa trabaho habang naghihintay ng resulta ng ginagawa kong pakulo sa laboratoryo. Napagdiskitahan ko ang family name niya. May kapareho kasi siya na Wu ang apelyido kaya pabirong itinanong ko kung magkamaganak ba silang dalawa. Hindi raw naman. Pareho ngang Wu ang apelyido nila kapag isinalin sa Ingles pero magkaiba naman daw ang bigkas at karakter nun kapag isinulat sa Intsik. Napangiti ako, sabay tanong kung ano ang ibig sabihin at kaibahan ng Wu niya sa Wu nung isa. Pinagtawanan niya ang tanong ko pero sinagot rin. Ang Wu daw niya ay may kaugnayan sa martial arts at Kung Fu, samantalang ang Wu nung isa ay hinugot sa bansag ng isang matandang kaharian sa Tsina. Humanga ako sa bilis ng sagot niya. Kapag ako kasi ang inurirat tungkol sa apelyido kong Narvaez ay wala akong maisasagot. Kailangan ko muna hanapin sa internet.

Hindi ako nakuntento, sinubukan ko pa siya. Inisa-isa ko ang mga apelyido ng iba pa naming kasamahang Intsik at hiningi ang kahulugan ng bawat isa. Mabilis lahat ang sagot. Di na niya kailangang magisip. Yung isa ang ibig sabihin daw ay “Dilaw”, yung isa ay “Matangkad”, yung isa ay “Oso”, yung isa ay “Salamat”, yung isa ay “Hari”, yung isa ay “Malamig”… Noong maubos ko na ang lahat ng pangalan ng kakilala kong Intsik, ako naman ang tinanong niya. Ano daw ang ibig sabihin ng apelyido ko? Pero hindi ko nga alam kaya natameme lang ako. Bagkus ay ipinaliwanag ko na lang na karamihan sa mga Filipino ay may apelyidong Kastila dahil naging kolonya ng España ang Pilipinas at sila ang nagbigay sa atin ng konsepto ng apelyido.

Ang corny di ba? Hindi naman kulay kastilaloy ang balat ko e bakit imported pa sa Iberian Peninsula ang apelyido ko? Sa totoo lang, inggit ako sa mga Pinoy na may apelyidong Tagalog (o Filipino) talaga ang pinagmulan tulad ng Dimaguiba, Bayani, Catacutan, Dimaano… Naging bida rin sana ako sa kuwentuhan nung araw na yun kung naging ganun ang apelyido ko. Kaso hindi e. Nakatatak na sa akin at sa mga magiging anak ko at mga magiging apo ko ang apelyidong ipinilit sa aking mga ninuno ng mga Kastila. Walang kabuluhan bukod sa pagiging apelyido na ibinigay sa atin ng mga dayo. Walang malalim na kasaysayan na maari kong ipagmalaki bilang isang Filipino. Isang apelyidong nagbibigay-pugay sa Kastila, hindi sa Filipino… Yan pang salitang “Filipino”, isa pa yan. Pero sa ibang blog post ko na lang yan titirahin at baka ma-overdose na tayo sa mga pag-aangas ko…

Natapos ang aming kuwentuhan dahil kailangan ko nang balikan ang inoorasan kong eksperimento pero di natapos ang aking pagiisip… Ikaw, alam mo ba ang ibig sabihin ng apelyido mo?

Mga Hangad na Aklat

Sa pagkakataong ito ay magfi-Filipino naman ako. Napansin ko kasing nag-ala-Tagalog na ang WordPress; bagaman di pa ganap ang mga pagsasalin. Bukod dito ay hindi naman yata magaling kung lahat na lamang ng aking isusulat ay gamit ang wikang Ingles. Isa pa’y Tagalog naman talaga ang pinili kong pangunahing wika nung ako ay nagsimula sa WordPress. Napukaw din ako ng kayayari lamang na artikulo (Filipino: Paraan ng Pagtanaw at Pananaw) ng hinahangaan kong manunulat na si Ginoong Añonuevo sa kanyang Alimbukad blog.

Ngunit hindi tungkol dito ang paksa ko. May mga aklat kasi na kating-kati akong bilhin simula’y aking napagalaman. Ito ang nais kong ibahagi. Una, ay ang “History Handbook for Overseas Filipinos.” Ayon sa paglalarawan ng Inquirer.net [1] at batay na rin sa pamagat, ang nasabing aklat ay nababagay na basahin para sa mga OFW na kagaya ko. Ang pagkakasulat ay talagang iniayon sa lumalagong bilang ng mga nangibang-bayan na Pinoy. Mahilig rin talaga akong magbasa ng mga aklat tungkol sa kasaysayan kaya tamang-tama ito para sa akin. Nagbilin na ako sa aking mga kaanak sa Pilipinas na ibili ako ng kopya at ipadala dito sa Hong Kong.

Ang ikalawa na nais kong bilhin ay ang “Special Centennial Edition” ng Philippine Journal of Science [2]. Biruin niyong mayroon pala tayong ganitong uri ng journal pang-agham. Naisip ko tuloy ang kabagalan ng gubyerno natin sa pagsusulong ng siyensiya kaya’t marami ang utak na bagkus sa Pilipinas pinapakinabangan ay sa ibang bansa nagagamit. Naalala ko rin tuloy noong nakaraang eleksyon, ikinampanya kong maigi sa aking mga kamaganak, kapitbahay at kasamahan sa trabaho ang AGHAM para sa Party List sa paniniwalang malaki ang tulong na magagawa nito. Halos lahat sila ay nahikayat kong bumoto para sa AGHAM Party List. Ngunit talagang mas marami ang di tumangkilik sa AGHAM kumpara sa bilang ng aking mga kamaganak, kapitbahay at ka-opisina. Wala sa kamulatan ng masa ang siyensiya. Nakakapanghinayang…

… Kapag umuwi ako ng Pilipinas sa kapaskuhan ay sasadyain ko ang pagbili ng nasabing journal. Marahil ay naipadala na rin sa akin ang kopya ng History Handbook pagdating noon. Gusto ko nang simulan ang pagbabasa…


THE BLOG AND THE AUTHOR:

...sapagkat ang gobyerno natin ay may "cash cow mentality" pagdating sa mga Overseas Filipino Workers.

(Read On "Milking the Cash Cow")

...sapagkat ako ay isa ring OFW; may mithiin, marunong magisip at nagnanais marinig... Makabagong bayani daw... Sa totoo'y tampok na gatasan ng pamahalaan. (English)

Subscribe to cashcow feed
Add to Technorati Favorites

RSS What’s new in Shuttercow?

Blog Stats

  • 121,325 hits
blogarama - the blog directory
Sali Na! Join the Pinoy Wordpress Bloggers Community!